​គិត​ត្រឹម​យប់​នេះ ​ពលករ​មក​ពី​ថៃអាចមាន​ជាង​​១០​នាក់​ហើយ​ឆ្លង​កូវីដ​១៩

នាព្រលប់ថ្ងៃទី៣១ ខែធ្នូ ឆ្នាំ២០២០ នេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានចេញសារសំឡេងសំខាន់បន្ទាន់មួយ ពាក់ព័ន្ធបញ្ហា កូវីដ-១៩ ជាពិសេសបណ្តាខេត្តជាប់ព្រំដែន កម្ពុជា-ថៃ ឲ្យកងកម្លាំងត្រូវគ្រប់គ្រងឲ្យបាន ចំពោះពលរដ្ឋខ្មែរនៅថៃ ដែលបានត្រឡប់មកស្រុកកំណើតវិញ ត្រូវធ្វើចត្តាឡីស័ក ឲ្យបានត្រឹមត្រូវដាច់ខាត ។

ក្នុង​នោះ ​សម្ដេច​បាន​បញ្ជាក់​ថា​គិត​ត្រឹម​ល្ងាច​នេះ ​មាន​ពលករ​ថ្មី​ដែល​រក​ឃើញ​ថា​ឆ្លង​មេរោគ​កូវីដ​១៩ ​បន្ថែម​៦​នាក់​ហើយ ​និង​មាន​ករណី​សង្ស័យ​ថា​ឆ្លង​នោះ​មាន​ច្រើន​នាក់​ទៀត ដូច្នេះ​អាច​នឹង​មាន​ជាង​១០​នាក់​ឯ​ណោះ ដែល​នេះ​ជា​ករណី​បន្ទាន់​មួយ ​ដែល​ត្រូវ​យក​ចិត្ត​ទុក​ដាក់​មែនទែន។ ​

ការដាក់បទបញ្ជាយ៉ាងដាច់ណាត់ថ្មីមួយនេះរបស់សម្ដេចតេជោ ហ៊ុន សែន ត្រូវបានសម្ដេចអះអាងថា ដើម្បីទប់ស្កាត់ការឆ្លងរីករាលដាលជំងឺកូវីដ-១៩ ចូលសហគមន៍ក្នុងប្រទេសកម្ពុជា ជាថ្មីម្ដងទៀត បន្ទាប់ពីក្រសួងសុខាភិបាល រកឃើញថាមនុស្សប្រមាណជិត១០នាក់ហើយ បានឆ្លងជំងឺកូវីដ-១៩ ចេញពីប្រទេសថៃ។